अजब गजब - ९५ : देवलगढ़
Bhoyar culture _ भोयर संस्कृति
Bhoyari dialect _ भोयरी बोली
उत्तराखंड को गढवाल इलाखो . गढवाल पर ६० पवार / परमार राजाना न ९१५ साल राज कऱ्यो . इ.स. ८८७ पासीन इ.स. १५१२ वरी येनअ राज की राजधानी रही चांदपुर गढी , इ.स. १५१२ पासीन १५१७ वरी देवलगढ, इ.स. १५१७ पासीन सीरीनगर ( सीरीपुर ) आन् आखरी म इ.स. १८१६ पासीन १८६२ वरी टिहरी !
देवलगढ रीसीकेस पासीन २१ कि.मी. आन् सीरीनगर ( पौडी गढवाल ) पासीन १९ कि.मी. दूर स .
देवल रीसी को आसरम यहान होतो , तेकन येनअ जागा को नाव पड्यो ' देवलगढ ' .
* इतिहास : * इ.स. ८८७ म मालवा को राजकुमार कनकपाल बदरीनाथ क तीरथ यातरा पर आयो . वोनअ बेरा चांदपुर को राजो होतो , राजा भानुप्रताप . राजा ला राजकुमार कनकपाल को सोभाव गुन भायी आवड्यो . वून न आपली पोटी को बिह्या राजकुमार कनकपाल सीन कऱ्यो . राजा भानुपरताप क सर्गवास क बास्त इ.स. ८८८ म राजकुमार कनकपाल राजो बन्यो . गढवाल क पवार / परमार वंस को संस्थापक राजो कनकपाल स . वून न इ.स. ८९८ वरी राज कऱ्यो .
* इ.स. ११९१ म गढवाल पर नेपाली राजो असोक चल्ल न हमलो कऱ्यो . तब क पवार राजा आनंदपाल न वोला हारायो .
* पवार राजा सोनपाल न भिलंग घाटी कबजा म लेई .
* पवार राजो लखन देव , आपला सिक्का चलावनी वाला पह्यला राजा हय .
* इ.स. १४५५ म लिख्यो राजा जगतपाल को तांबा को पत्तर सापडेस .
* दिल्ली को सुलतान ( इ.स. १४५१ - ८८ ) बहलोल लोदी न परमार राजो बलभद्र को ' शाह ' को खिताब देयो .
* परमार वंस को ३७ वो राजो ' अजयपाल ' महान समराट होतो . इ.स. १४९० म वून गढवाल का सारा ५२ गढ जीत्या . सारो गढवाल वून क राज म आयो .
* इ.स. १४९१ म कुमांऊ को राजो किरतीचंद न गढवाल पर हमलो कऱ्यो . राजा अजयपाल न वोला साजरो थेथऱ्यो आन् संधि करन ला भाग पाड्यो .
* इ.स. १५१२ म राजा अजयपाल न राजधानी चांदपुर गढी सीन देवलगढ म ल्यायी .
*: राजा अजयपाल न कत्युरी राजा ला हाराय कन् वोकअ सोना क सिंगासन प कबजो कऱ्यो .
* राजा अजयपाल अफगानी राजो सिकंदर लोदी क समकालीन होतो .
* राजा अजयपाल न केंद्रीय फऊज बनाई . आन् खानो बनावन साठी सरोला बामन धऱ्यो .
* ठाकूर सूरवीर सिंग न लिखी ' सॉवरी ' नाव क पोथी म राजा अजयपाल ला ' आदिनाथ ' आन् ' महात्मा ' कह्येस .
* राजा अजयपाल न राजराजेस्वरी देऊर बांध्यो . इ जागरुत सिध्दपीठ स .
* येनअ महान वंस म च महारानी करनावती भयी . राजा महिपत स्याह क सर्गवास क बाद वा सति नी गयी . आपलअ ४ साल क पोरग्यो , राजकुमार पुरथी सिंग संगअ रह्य कन् वून न राजपाट संभाल्यो . स्याहजहान न नजाबत खान ला जब हमलो करन साठी पठायो तब महारानी करनावती न वोला हारायो आन् सबन मुघल फऊज की नाक काटी . लाज क माऱ्या नजाबत खान न आत्महत्या करी .
# देवरगढ म माय गौरजा देवी , माय राजराजेस्लरी , खेत्रपाल देवल , कालनाथ भयरव देवता , बाबा सत्यनाथ कमलनाथ पीठ , सीरी लक्षुमी नारायन पीठ , सीरी दत्त असा कयी देऊरना स . गुरू गोरखनाथ को चेलो सत्यनाथ की गुफा स . सोम का भांडा ( डंडा ) स्मारक क दिवाल प कूटलिपि अंकित स .
# येपरील मह्यना म माय राजराजेस्वरी को मोठो मेलो भरस .
( सहयोग : इंजि . जालम सिंग जी सोढा , बिकानेर )
लेखक : सुरेश महादेवराव देशमुख , नागपूर
अच्छी इतिहासिक जानकारी
ReplyDelete