अजब गजब - ९२ : ढोला - मारू
Bhoyar culture _ भोयर संस्कृति
Bhoyari dialect _ भोयरी बोली
राजस्थान क लोककथा म कयी प्रेमकथा परचलित स . पर इन म सबसीन परसिध्द स " ढोला - मारू " की प्रेम गाथा ! ८ वी सदी की येनअ कहानी को राजस्थान क लोककथा , लोकगीत पर येतरो असर स क , आबअ बी रूपवान लाडा - लाडी ला यहान ' ढोला - मारू ' की उपमा देस आन् कयी मवका प ' ढोला - मारू ' का गाना गावस .
नरवर को राजो नल को पोरग्यो ढोला / साल्हकुमार . जांगलू देस ( बिकानेर ) क पूंगल ठिकाना को पवार / पुवार राजो पिंगल की पोटी मारवणी / मारूवणी . मारूवणी को नान्हो स्यबद रूप ' मारू '!
ढोला को बिह्या नान्हपन म च मारवनी संग भयोतो . वोनअ बेरा ढोला की उमर होती ३ साल अन् मारू की देढ़ साल ! बिह्या भयो पर गवनो नी भयो . मोठो भया बास्त ढोला को बिह्या ' मालवणी ' संग भयो . नान्हपन म मारूवनी संग भया बिह्या ला ढोला बिसर गयोतो . इतअ पूंगल म मारूवनी जवान भयी . वोकअ रूपरंग की चरचा इलाखा म होन ला लागी . ढोला की दुसरी लाडी मालवनी ला मारूवनी क रूपरंग को हिरस वाटत होतो .
मारूवनी क माय बाप न नरवर ला संदेसो लेय कन् कयी दूत पठाया , पर ना दूत वापिस आया न संदेसा को जवाब ! राजा पिंगल पवार किथीन आया संदेसा ढोला की रानी मालवनी फाड कन् दूत ला मार डावती . कोई बी संदेसो ढोला वरी जात च नी होतो .
इतअ राजकुमारी मारूवनी की हालत खराब होती . वोला सोता - उठता ढोला च दिसत होतो . वोला ना अनपानी गोड लागत होतो ना कोनतअ कामधंदा म मन लागत होतो . वोकी हालत देख कन् माय न राजा पिंगल ला अनखिन नरवर ला संदेसो पठावन साठी राजी कऱ्यो .राजा पिंगल न सोचबिचार कर कन् नयी तरकीब निकारी . दूत पठावन क जागा प वून न चतुर दाढ़ी ( ढोली ) ला पठायो . जब ढोली ( दाढ़ी ) नरवर जान साठी निकऱ्यो तब मारूवनी न वोला बलायो आन् वोला दोहा लिख कन् देया . दाढ़ी गाना गावन म वस्ताद होतो . वू नरवर पुग्यो . अन् राजा क ( ढोला ) महाल जवर जोर जोर कन् गाना गावन लाग्यो. रात भयी.. अगास म इज चमकन लागी... बरसाद बी चालू भयी... ढोली आबअ मल्हार राग म गाना गावन लाग्यो...
आखडिया डंबर भई , नयण गमाया रोय ।
क्यूं साजण परदेस में , रह्या बिंडाणा होय ।।
दुज्जन बयण न सांभरी , मना न वीसारेह ।
कूंझा लाल बचाह ज्यूं , खिण खिण चीतारेह ।।
जे थूं साहिबा न आवियो , सांवन पहली तीज ।
बीजळ तणे झबूकडै , मूंध मरेसी खीज ।।
नमणी , खमणी , बहुगुणी , सुकोमळी सुकच्छ ।
गोरी गंगा नीर ज्यूं , मन गरवी तन अच्छ ।।
गति गयंद , जंघ केळ ग्रभ , केहर जिमी कटि लंक ।
हीर डसण विप्रभ अधर , मरवण भ्रकुटी मयंक ।।
आदीता हूं , उजलो मारूणी मुख ब्रण ।
झीणां कपडा पैरणां , ज्यों झांकीई सोब्रण ।।
दाढी ( ढोली ) सारी रात गावत रह्यो . सकारी ढोला न वोला बलायो . दाढी न ढोला ला सारी हकीकत , करम कहानी सांगी . ढोला न आपली लाडी ' मारूवणी ' ला ल्यावन की तैयारी करी . पर हर डाव ढोला की दुसरी लाडी मालवनी अडंगो डावत होती . पर येक दिन ढोला आपलअ तेजतर्रार उट प सवार भयो . हवा क गति कन् ढोला पूंगल आयो . राजा पिंगल पवार जी न वून को मानपान कऱ्यो . ढोला ला देख कन् ' मारूवणी ' ला घाडी खुसी भयी . वोकअ मन को राजकुमार .... वोको लाडो ढोला , जेला सपना म च देख्योतो वू आबअ डोरा आघ होतो . ढोला - मारू कयी दिन वरी पूंगल म रह्या . ढोला ला मारूवणी ला लेय कन् नरवर ला वापिस आवन को होतो . राजा पिंगल पवार जी न ढोला - मारू ला बिदा कऱ्यो .
रस्ता म मारूवणी ला पान लाग्यो . पर महादेव पाराबती न आय कन् मारूवनी ला जीवन दान देयो . मुसीबत यहान च खतम नी भयीती . आघअ उमरा - सुमरा मारूवणी प टप कन् च बस्याता . वून न ढोला ला अमल साठी आवतन देयो . मारूवनी उट पर च बस कन् रही . दाढी ( ढोली ) गाना गावत होतो . दाढ़ी ( ढोली ) क लाडी ला उमरा - सुमरा क मनसुबा की भनक लागी . वोनअ चुपचाप या बात उट प बसी मारूवनी ला सांगी . मारूवनी न उसीच उट ला टाच मारी . उट भागन ला लाग्यो . उट ला पकडन साठी ढोला धाय कन आयो . मारूवनी न वोला हकीकत सांगी . दुय झना उट पर बस कन् हवा सरीखा भाग्या . उमरा - सुमरा क घोडा क पकड म बी वूई नी आया .
ढोला मारूवनी ला लेकन नरवर आयो . नरवर आय कन् मारूवनी आन् मालवनी ढोला संगअ हासी - खुसी कन् रव्हन लाग्या .
८ वी सदी की येनअ प्रेमकथा ला ११ वी सदी म कवि कलोल न दोहा म लिखी ...
सोरठियो दुहो भलो , भलि मरवणरी बात ।
जीवन छाई धण भली , तारां छाई रात ।।
_ असी राजस्थानी लोककथा / लोकगीत म ढोला - मारू की या अमर प्रेम कहानी !
लेखक : सुरेश महादेवराव देशमुख , नागपूर
No comments:
Post a Comment