भोयरी संस्कृति - ३८ : गोंदन. bhoyar culture _ भोयर संस्कृति. bhoyari dialect _ भोयरी बोली

भोयरी संस्कृति - ३८ : गोंदन

Bhoyar culture _ भोयर संस्कृति

Bhoyari dialect _ भोयरी बोली

गोंदन ला गुदनो , गोदनो , ट्याटू , पछेना , अंकन असऽ नाव कन् बी वोरखस . आंग पर ( हात , बोट , मनगट , पाय , गरदन , दंड , पाठ , मुंडो ) चितरंग , चिन्ह , आकरूती काढन साठी चमडी प टोच कन् रंगवन की कला ला गोंदन कोस . 

गोंदन को चलन : गोंदन कला धारमिक जीवन , संस्कृति , कुल , रिवाज , परंपरा , सामाजिक मोल , मान्यता ,  फ्यासन असी कयी रूप म दिसस . गोंदन ला सिंगार , साजरपन , प्रेम , स्यील , बहादुरी को प्रतिक , हिंद्यान साठी बी काढस . 

जेनऽ काल म कला आन् कलाकार या संकल्पना च नी होती  , वोनऽ जमाना पासिन आदिवासी लोगना न कला आन् साजरपन को साजरी बानगी गोंदन कला क रूप म दुनिया ला देयीस . 

इतिहास : * वेद म गोंदन को उल्लेख नहाय . या आदिवासी कला बाद मऽ हिंदू संस्कृती म आयी . 

* ५३०० बरस पुरानऽ ' ओत्सी द आईस मॅन ' येनऽ आदिमानव क आंग पर ५७ गोंदन का चिन्ह सापड्यास . मिसर ( इजिप्त ) क ममी क आंग पर बी गोंदन दिख्येस . 

* बायबल , कुरान न गोंदन ला वरजिक मानेस . हिंदू संस्कृती न आदिवासी क गोंदन कला ला रिवाज म डाये . 

* छत्तिसगढ म रामनामी समाज आंगभर रामनाम गोंदस . या परंपरा १०० बरस पासिन स . 

* गोंदन की चाल भेव आन् सरधा पासिन पडी . भूतखेत  , बिचुकाटा - जनावर , देवता क नाराजी पासिन गोंदन रखवाली करस , या भावना होती . बाद मऽ कुर कबिला का चिन्ह आया . वोकऽ बाद सिंगार , हिंद्यान साठी गोंदनो आयो . आब त फ्यासन स ! आब ट्याटू ( tattoo ) काढकन्  # inked असो ट्याग बापरकन् Instagram पर डावस ! 

* कपडा पेहरन ला सुरवात होन क पह्यले पासिन गोंदन ला सुरवात भयी . 

मान्यता : * आदिवासी गह्यना परस गोंदन ला महत्व देस .

* आंग पर गोंदे रह्ये त सर्ग म जागा भेटस , असी मान्यता स .

* आदिवासी आपलऽ कुर को चिन्ह गोंदस . गोंदन को चिन्ह देख्या बास्त देखनी वाला ला आपरंग च वोकी जात , कबिला की जानकारी होस . 

* गोंदन क बेरा पोरग्यो गोंदन को दुख , अगिन सह्यन नी करत होयेन , त वू पोरग्यो लढाई क काम म नी आयेन . आन् पोटी ला गोंदन की तकलिफ सह्यन नी होत होयेन त वोला बारतपन म तकलिफ जायेन , असी मान्यता स . 

_ भारत म गोंदन क रंग साठी बाई को दूध / कारला को रस , खान को तेल , काजर , बिवला झाड को रंग असा कयी परकार का रंग बापरस . चमडी का सात थर रव्हस . वोमऽ क वरतऽ क तीन थर गोंदन को रंग जास . कारो , निरो , हिवरो , लाल रंग गोंदन म जास्त दिसस . 

पह्यले आदिवासी बाईलोग ना गोंदन को काम करत होती . आब गोंदन करनी वाला लय कलाकार भेटस . पुरानऽ जमाना मऽ गोंदन क बेरा पोटी बाटीना रोवत होती . तब गोंदनी वाली आदिवासी बाईलोगना वून ला समजावन साठी गाना गावत होती . 

भोयरी संस्कृति मऽ बाईलोग , पोटीना थोडोबूत गोंदस . 

* जलमभर सवासिन रह्या पायजेन येक साठी माथा पर कुकू क जागा पर नानोसो टिक्को गोंदस .

* जेवनऽ हात क मनगट पर तरहात कितऽ भाऊबीज गोंदस . येक चंदर कोर आन् वरतऽ खलतऽ येकेक बिंदी असो भाऊबीज को चिन्ह रव्हस .

* जेवन हात क अंदर वाली जागा ( मनगट पासिन ढोपर पावतर ) प भावली ( बाहुली ) गोंदस . मंझार म येकच मुंडो आन् दुय आंगऽ चिन्ह रव्हस . 

* डाखऽ हात क अंदर वाली जागा ( मनगट पासिन ढोपर पावतर ) प सीता नहानी गोंदस . मंझार म गोल भिर आन् चारी बाजू पायरी की डिझाईन असो भूमिती सरखो चिन्ह रव्हस . 

* डाखऽ हाथ क पंजा पर आंगठा कितऽ बिचू , चिल्हंगठी कितऽ चार नानी रेघना ( जेला गहू कोस ) आनं मंझार म फुल क डिझाईन वाली भिर गोंदस . मंझार की बिंदी ठोकर आन् वोकऽ भवताल साहा बिंदीना , असी भिर की डिझाईन रव्हस . 

* गोंदन क बेरा दुखसच . अगिन होस . गोंद्या बाद वोपर येरंडी को तेल आन् हरद को लेप लगावस . 

_ असी गोंदन की अदभूत कारागीरी आन् बदलतऽ जमाना संग वोको बदलतो रूप रंग !

# येक छत्तिसगढी लोकगीत ----

तोर नाव के गोंदणा गोंदाएव ,

मारे मया के चिन्हारी बर ,

अब्बडमया तोला करभव , 

मया पिरत के फुलबारी बर , 

गोंदाफुल करू हमर मया , 

फुलत रहय मया के बगिया मऽ . 

# लागं वतरा खणाई पणन कमी कोनी धणाई  (खूब गोंदाये पर बाटी नी )

# तोर नाव को गोंदन , डाखऽ हाथ प मिरवून .

# नांद कन् आयी पर गोंद कन् नी आयी .

लेखक : सुरेश महादेवराव देशमुख , नागपूर