अजब गजब - २६ : माय हरसिध्दि , बीजा नगरी. bhoyar culture _ भोयर संस्कृति. bhoyari dialect _ भोयरी बोली

अजब गजब - २६ : माय हरसिध्दि मंदिर

Bhoyar culture _ भोयर संस्कृति

Bhoyari dialect _ भोयरी बोली

मध्यप्रदेस म पग पग प कयी धारमिक मान्यता आन् चमत्कार वाला मंदिर स . मध्यप्रदेस म आगर मालवा जिला क बीजानगरी म असोच माय हरसिध्दि को चमत्कारी देऊर स . यहान दुय हजार बरस पासिन अखंड जोत जर रहीस . येनऽ देऊर ला उज्जयनी समराट विक्रमादित्य को भासो विजय सिंग न बनायेस . आगर मालवा पासिन बीजा नगरी २० कि.मी. दूर स . 

१. इतिहास आन् मान्यता : समराट विक्रमादित्य को भासो विजय सिंग माय हरसिध्दि को मोठो भगत होतो . जब विजय सिंग राजो होतो तब वूई रोज उज्जयनी ला माय हरसिध्दि क दरस्यन साठी जात होता . दरस्यन भया बास्तच वूई जेवत होता . वून की भक्ति देखकन् माय हरसिध्दि परसन्न भयी . माय हरसिध्दि न सपना म राजा ला दरस्यन देयकन् कह्ये क् , तुमी बीजा नगरी म म्हरो देऊर बनावो आन् वोकऽ दरुजा ला सूर्व्यमुखी धरो . राजा न वूसोच करे . बाद म माय हरसिध्दि राजा विजय सिंग क सपना म आयी आन् कह्ये क् , तुमारऽ बनायऽ देऊर म मु बिराजमान भयीस . तुमी न जी दरुजो सूर्व्यमुखी बनायतो वू पसचिम मुखी भयेस . राजो सकारीच उठकन् देऊर म गयो त का देखस ! देऊर को दरुजो खरच पसचिम म भयोतो . 

* साल भर यहान भक्तलोग की भीड रव्हस . नवरातरी ला त लाखों लोगना दरस्यन साठी आवस . माय क दरबार म हर मन्नत पुरी होस . जी भक्त नवस बोलस , वूई देऊर प गोबरकन् उलटो सस्तिक काढस . आन् नवस ( मन्नत ) पुरो भया बास्त सीधो सस्तिक काढस .

* माय हरसिध्दि सकारी नानोपन , दुफारकन् जवानी आन् दिनबुड्या बुजरूक क रूप म नजर आवस . 

* माय हरसिध्दि की दुय हजार बरस पासिन जर रहीस वा अखंड जोत हवा कन् नी बुझत . 

* नवरातरी म घट स्थापना पासिन अस्टमी पावतर यहान नारेल नी फोडत . 

लेखक : सुरेश महादेवराव देशमुख , नागपूर