अजब गजब - ३२ : चांदपुर गढी
Bhoyar culture _ भोयर संस्कृति
Bhoyari dialect _ भोयरी बोली
उत्तराखंड क मुख्य गढ म को येक चांदपुर गढ स . चमोली जिला क चांदपुर भाग म ' आदिबदरी ' क परसिध्द देऊर पासिन ३ कि.मी. प येक पहाड प चांदपुर गढ स . पायथा जवर चांदपुर गाव स . पहाडी प १.५ येकट म चांदपुर गढी फयलीस . येकदम वरतऽ खूब मोठो फाडी को चबुतरो स . गढी को खंडारो आन् येक देऊर स . चांदपुर की आटागाड नदी गढी क पहाडी ला अरधी ( १८०° ) घेरकन् आघऽ जास . गढी क दिवाल प कयी चितरंग आन् देवी देवता की मूरतीना स . जमीन पर वहान क चट्टान ला काटकन च पानी की नालीना बनायीस . गढी क चवडी दिवाल म खिडकीना बनीस . अंदरीन वा ३ वर्ग फिट पन् बाह्येरीन १/२ वर्ग फिट की च स. तेकन येमीन बाहिरवालो आव नी सकस पन् अंदरवाला ला बाहिर को सबन दिसस .
इतिहास : * गढी प येक मोठऽ भीर का अवसेस स . भीर मिन नदी पावतर येक भूयार होती , जेमिन नदी को पानी गढी पर आनत होता , असी मान्यता स .
* इ. स. ८८८ म धारा नगर सिन गढवाल आया राजकुमार कनक पाल को बिह्या गढवाल क राजा भानुपरताप की नानी पोटी सिन भयो . गढवाल क परमार राजवंस को कनकपाल ला मूल पुरुस मानस . कनकपाल ला चांदपुर को राज बी भेटे . कनकपाल को ३७ वो वंसज अजयपाल होतो . राजा अजयपाल न गढवाल क नानऽ नानऽ गढना ला जीत कन् गढवाल राज की स्थापना करी आन् देवलगढ क जागा पर इ.स. १५१७ म सिरीनगर ला आपली राजधानी बनायी . चांदपुर परीन देवलगढ जान की तारीख मालूम नहाय पर चांदपुर गढ ला कयी सदी पावतर उत्तराखंड क इतिहास म खास जागा भेटत होती .
लेखक : सुरेश महादेवराव देशमुख , नागपूर
धन्यवाद सर
ReplyDeleteअतिउत्तम माहीती दिस एतिहासिक चांदपुर क बाराम् ।।
ReplyDeleteधन्यवाद सर
Delete