भोयरी संस्कृति , भाग - १९ : नागदिवा

( bhoyari dialect )( bhoyar people - bhoyari culture ) भोयरी संस्कृति , भाग - १९ : नागदिवा

शुक्ला मार्गशिरे पुण्या श्रावणे या च पंचमी ।

स्नानदानैर्बहुफला नागलोक प्रदायिनी ।।

भोयरी संस्कृति मऽ नागदिवा को तिवार मारगसिर्स ( अगहन ) मह्यना कऽ चांदनी ( उजरी ) पंचमी पासिन मारगसिर्स पुनव ( अगहन पुनव ) पावतर मनावन को रिवाज सऽ .

* महाराष्ट्र क कयी भाग म मारगसिर्स ( अगहन ) मह्यना कऽ चांदनी ( उजरी ) पंचमी ला च नागदिवारी मनावस आन् कुलदेवता की पूंजा करस .

* येनऽ पंचमी ला च नागपूंजा पंचमी , विवाह पंचमी , बांके बिहारी परगट पंचमी यी बी नाव स .

१ . दिनविस्येस : मारगसिर्स ( अगहन ) मह्यना मऽ भगवान सिरी राम आन् सीता देवी को ब्याह येनच पंचमी ला भयेतो . सीता देवी को ' स्वयंवर ' राजा जनक न जेन दिन राखेतो वू दिन होतो मारगसिर्स ( अगहन ) मह्यना की चांदनी ( उजरी ) पंचमी ! भगवान राम - सीता देवी क ब्याह संगच सिरी लछमन - देवी उरमिला , सिरी भरत - देवी मान्डवी , सिरी स्यतरुघन - देवी सृतकिरती को बी ब्याह भयो .

२. मान्यता : येनऽ पंचमी ला नागपूंजा बी रव्हस . स्कन्द पुरान कऽ अनुसार येनऽ पंचमी ला उपास धरकन् नाग पूंजा करनी वाला की कयी मनोकामना , इच्छा पुरी होस . याच पूंजा मनजे ' नागदिवा ' मराठी म नागदिवा ला नागदिवे , नागदिवाळी बी कोस .

३. पूंजा :  भोयरी संस्कृति मऽ जरी नागदिवा को तिवार पंचमी पासिन मारगसिर्स ( अगहन ) पुनव पावतर मनावस तरी येनऽ पूंजा ला बस्तरवार आन् मंगरवार वर्जिक स . इ दुय दिन सोडकन् बाकी दिन नागदिवा की पूंजा करता आवस .

# नागदिवा क  पूंजा साठी पाच , सात ,नव असा विस्यम संख्या म दिवा बनावस .

# नागदिवा पीठ , कनिक , पुरन का बनावस . यी दिवाना भाप म उकडस . भाप की सुबिधा नही जमी त् भात म च सिजवस . 

# नागदिवा क दिन कढय बी करस . ( सिरो ) 

# चवरी आघऽ चऊक पुरकन् वोपर खारी नही त् नवो कपडो धरस . वोपर आरती थाटी मांडस . वोनऽ आरती म जी दिवाना बनायता , वूई धरस . येनऽ दिवा को आकार दिवनाल सरिखो रव्हस . वोमऽ तूप आन् बात डावस आन् दिवा उजरस . बगल म कढय बी मांडस ‌. नागदिवा क आरती ला आप आपलऽ हिसाबकन् साजरी सजवस . आघऽ आन् कढय म उदबत्ती लगावस . नागदिवा आन् कढय की हरद - कुकू , अकसिद , बेल - फुल कन् पूंजा करस . रार - गुगुर बारस . 

# पूंजा करनी वाला महादेव मुखऽ रह्यकन् पूंजा करस . 

# कोनी कोनी का नागदिवा नवस का बी रव्हस .

# नागदिवा - कढय की पूंजा भया बाद आरती करस. 

# पीठ , कनिक , पुरन कन् बनाया नागदिवा को परसाद बनावस आन् गाय- बासरु ला निवद देस .

( सहयोग : सौ. पार्वतीबाई महादेवराव देशमुख ) 

लेखक : सुरेश महादेवराव देशमुख , नागपूर .