अजब गजब - ८७ : मांडवरायजी
Bhoyar culture _ भोयर संस्कृति
Bhoyari dialect _ भोयरी बोली
कंकुवर्णि भोमका सरवो सालेमाळ ।
नर पटाधर निपजे भोय देव को पांचाल ।।
नदी खळके नीझरणा मलपता पीए माल ।
गाळे कसुम्बा गोवालिया पड जोवो पांचाल ।।
ठांगो मांडव ठीक छे कदी न आंगन काल ।
चारपगा चरता फरे पड जोवो पांचाल ।।
गुजरात क सुरेंद्रनगर जिला म , सुरेंद्रनगर पासीन २१ कि.मी. अन् अहमदाबाद पासीन १४७ कि.मी. दूर ' मुली ' गाव स . परमार राज की मुली येक रियासत होती , जे म २४ गाव होता . तेकन च वोला ' मुली चौबिसी ' नाव पड्योतो . मुली रियासत , मांडवरायजी को इतिहास मोठो गवरवस्याली स .
मुली म परसिध्द ' मांडवरायजी ( सूर्व्य भगवान ) ' को देऊर स .
इतिहास : * थरपारकर , अमरकोट ( सिंध प्रांत ) , जी आबअ पाकिस्तान म स , यहान परमार राजपूत को राज होतो . यहान क राजघराना को पह्यलो राजो ' सोढाजी ' , तेकन नाव पड्यो ' सोढा परमार ' !
* सोढाजी ला ४ पोटुना होता . १. आखोजी २. आसोजी ३. लखधीर ४. मुंजोजी . सोढाजी क रानी को नाव ' जोम बाई ' .
* संवत् १४७४ म थरपारकर म ( सिंध ) मोठो अकाल पड्यो . २००० सोढा परमार क जीव की बात होती . आबअ का करनु ? मोठो भाई आखोजी न कह्ये क , लखधीर मुंजाजी ला संग लेय कन् सुबिधा वालो इलाखो खोजेन... अन् मु आसोजी संगअ यहान च रव्हूस .
* लखधीर ला भाई की बात पटी ( जंची ) . पर माय जोम बाई न कह्ये क , परमुलुख म इन ला माय कहान भेटेन ? तेकन मु बी लखधीर क संग जावूस .
* लखधीर आपलऽ हंसली घोडी पर बस्यो आन् निकर पड्यो नवो देस खोजन साठी ! पर लखधीरजी को येक नेम होतो . वूई पीलू क देवी माय की पूंजा कऱ्या बिगर जेवत नी होता . वूई रोज आघअ जाता , पर लखधीरजी पूंजा साठी रोज पासअ आवत होता . तेकन रोज को पल्लो जास्त बाहाडत नी होतो . येक दिन लखधीरजी ला सपना म देव न दरस्यन देये अन् कह्ये क , सकारी सकारी येक काऱ्होड खुर कन् जमीन खांदती दिसेन . वहान तुमी खांदो... वासीन तुमाला म्हरी मूरती सापडेन . वोनअ मूरती ला तुमी संग लेय कन् जावो. वोकी पूंजापाती कर कन् तुमी भोजन कर सकेन. पर येक बात ध्यान म धरो क , जब तुमारो रथ कही फसेन त तब वहान च म्हरी थापना करो आन् गाव बसाडो .
दुसरअ दिन उसोच भयो . वून न मूरती रथ म धरी आन् आघअ चालन ला लाग्या . चालता - चालता भोगवो नदी म वून को रथ फस्यो . घाडी कोसिस करी पर रथ गुंजा भर बी नी सरक्यो . लखधीर जी न कह्ये , हे देव येनअ नदी म कसो गाव बसाडू आन् तुमारी थापना करू ? थडी पावतर त चालो देव !
देव की किरपा भयी आन् रथ थडी पावतर आयो . लखधीर जी न आदेस देयो क यहान च आपरो गाव बसाडजेन . भोगवो नदी क किनारा पर सबन सामान उताऱ्यो .
* लखधीर जी न बिचार कऱ्यो क जेनअ राजा को इ इलाखो होयेन , वून ला पुसनो जरूरी स . वून न सबन ला रव्हन - खावन की येवस्था करन ला सांग्यो आन् आपलअ हंसली घोडी पर सवार होय कन् निकऱ्या . यहान राज होतो वढवान क वाघेला राजो वीसलदेव को . लखधीरजी वढवान पुग्या . राजो चोपाट खेल रह्योतो . वून न लखधीरजी ला बी खेलन ला कह्यो . लखधीरजी को खेल देख कन् राजो वीसलदेव परसन्न भयो . वून न लखधीरजी न मांगीती वोकअ परस जास्त जमीन देई , पर येक अट धरी क , लखधीरजी ला रोज वढवान आय कन् चोपाट खेलनो पडेन . लखधीर जी राजी भया . राजा क दरबार म या बात कयी लोगना ला साजरी नी लागी . वूई खुन्नस पकड कन् रह्या .
* येक चभाड राजपूत लोगना न जानबुज कन लखधीरजी क इलाखा जवर सिकार करी. वून क मार कन् येक तेतर पाखरू घायल भयो अन् वू जीव बाचाडन साठी लखधीरजी क गाव म आयो . अन्यासकरनी वू तेतर मांडवरायजी क मूरती पासअ लुक्यो . माय जोम बाई न वोला देख्यो आन् आपलअ पल्लू म धऱ्यो . लोकअ पासअ ५०० चभाड लोगना आया आन् तेतर ला मांगन लाग्या . रानी जोमबाई न कह्ये क , कोनतो बी राजपूत स्यरनागत को जीव बाचाडस . इ तेतर म्हरअ स्यरन म स , वोला बाचाडनो म्हरो धरम स . तुमी वापस जावो . चभाड लोगना न लढाई साठी ललकाऱ्यो . डेरा पर मुंजाजी जवर सिरफ १४० परमार लोग होता . रानी जोमबाई न कह्ये क , म्हरा वीर आपलो धरम निभायेन . ५०० चभाड संग १४० झन भिड्या आन् येक - येक ला काटता काटता वीरगती ला प्राप्त भया . लखधीर जी ला वढवान म या बात मालूम पडी . वूई आया तब वरी ५०० चभाड की लासना जमीन पर पडीती . भाई मुंजाजी बी देव क घर गयाता . मुंजाजी पोरग्या संग माय जोम बाई सती गयी .
* लखधीर जी ला येक रबारन ( गोपालक क्षत्रिय जात की बाई ) न भाई मानेतो , वोको नाव ' मुली ' . वोक च नाव पर लखधीरजी येनअ नवो गाव को नाव धऱ्यो , ' मुली ' . या मुली च ' मुली रियासत ' की राजधानी ! लखधीर जी न यहान च वून ला सापडीती वोनअ सूर्व्य देव की मूरती साठी मोठो देऊर बांध्यो , जी मांडवरायजी क नाव कन् परसिध्द भयो .
# येक तेतर पाखरू साठी आपरा जीव देन वाला आपलअ पीतर / पूर्वज को आमाला अभिमान वाटे पाह्यजे...
# जेनअ कुर - वंस म जल्म्या , वोकअ धरम साठी आपरअ जीव की बाजी लगावनी वाला पूर्वजना ला सव सव नमन .
# जय मांडवरायजी की....
( सहयोग : इंजि. जालम सिंह सोढ़ा जी , जोधपुर )
लेखक : सुरेश महादेवराव देशमुख , नागपूर
साजरी इतिहासिक जानकारी
ReplyDeleteधन्यवाद जी 🙏🙏
Delete