अजब गजब - ४५ : मन्नाथेश्वर मंदिर , घोग्रा. bhoyar culture _ भोयर संस्कृति. bhoyari dialect _ भोयरी बोली

अजब गजब - ४५ : मन्नाथेश्वर मंदिर , घोग्रा

Bhoyar culture _ भोयर संस्कृति

Bhoyari dialect _ भोयरी बोली

महाराष्ट्र म नागपूर जिला क नरखेड तहसील म कारंजा - भारसिंगी सडक प लोहारी सावंगा क आघ घोगरा गाव स . घोगरा गाव क डाखऽ हात प मन्नाथगड स . 

मु आन मनोज भाऊ गोरे पुरातन मन्नाथेस्वर क दरस्यन साठी नागपूर परिन निकऱ्या . लोहारी सावंगा परिन विक्की बन्नगरे बी संग आयो . अन्यासकरनी वोन दिन च ' मन्नाथेश्वर मंदिर उत्सव कमिटी ' की मन्नाथगड प मिटिंग होती . मिटिंग म कमेटी अध्यक्ष सुधाकर भाऊ घागरे , सचिव रामनाथ गोरे , वसंतराव चापले , डॉ . संजय ढोकणे , सुरेश पठाडे , नरेश मानमोडे , डॉ . प्रमोद गोरे , पंकज खवशी , उत्तमराव पेठे , सुरेश कुमेरीया , पुंजाराम मुरोडीया असा बीस तीस लोगना होता . मिटिंग म मला सबन न परिचय सागे . मु न कमेटी ला म्हरी लिखी पुस्तक , ' भोयरी मराठी शब्दकोश आणि भाषा विज्ञान ' इ सप्रेम भेट देयी . सबन सिन वोरख भयी . कमेटी न मन्नाथेस्वर सिव जी की महिमा सांगी . 

घोगरा परिन मन्नाथगड पर जान साठी आडीमोडी की आन् चढाई की डांबर सडक स . वोनऽ सिवार की मन्नाथगड या सबसिन उच्ची जागा ! वासिन पंधरा गाव को सिवार दिसस . चारी कितऽ भोयर समाज का गावना . मन्नाथगड ला तिर्थक्षेत्र को सरकारी दर्जो बी भेटेस . मन्नाथेश्वर मंदिर भारतीय पुरातत्व विभाग क हात खलतऽ आवस . वून न बोर्ड लगायकन आपली जिम्मेदारी पुरी करीस ! इ तिर्थक्षेत्र रामायण काल पासिन को स . आन् मन्नाथेस्वर सिव जी को हेमाडपंथी देऊर त दिठ लागन जोगतो ! 

१. इतिहास आन् मान्यता : * हठयोग प आधारित नाथ संप्रदाय , हिंदू धरम को भगवान भोलेनाथ ला माननी वालो पंथ . हजारों बरस पासिन भारत च नी त् मक्का मदिना , अफगाणिस्तान , पाकिस्तान , सिरी लंका , नेपाल , तिब्बत , बंगला देस , बरमा , सयाम , व्हियटनाम , कंबोडिया पावतर भगवान भोलेनाथ को डंको नाथ पंथ न बजाये आन् भगवान भोलेनाथ क परंपरा ला खरऽ रूप कन् आघऽ बढाये  . आदिनाथ भोलेनाथ नाथ पंथ का पह्यला गुरू . नव नाथ की गुरू परंपरा म ८४ महासिध्द गुरू भया . गुरू मछिंदरनाथ ला नाथ संप्रदाय का संस्थापक मानस . वून की समाधी उज्जैन म गढकालिका माय क देऊर आन् भरतरी गुफा जवर स . मछिंदरनाथ ला च मत्सेंद्रनाथ , मचिंद्रनाथ , मच्छिंद्रनाथ आन्  " मीननाथ " कोस . वून न यहान जप तप करेतो . वून क नाव परिन च येनऽ गड ला मन्नाथगड आन् यहान क सिव जी ला ' मन्नाथेश्वर सिव जी ' कोस , असी मान्यता स . 

* मन्नाथेस्वर देऊर क जेवनऽ हात प येक नवो देऊर दिसस . येनऽ देऊर की बी कथा अजब गजब च स . इ देऊर यहान क रामदास महाराज क हात पर बांधे . येनऽ देऊर म मन्नाथबाबा की तिरकोनी आकार की मूरती स . देऊर बांधन क पह्यले यहान घोगली को झाड होतो आन् वोक खलत च मन्नाथबाबा होतो . मन्नाथबाबा नवस / मन्नत ला पावस , असी मान्यता स . तब लोगना पोटुबाटु भया पायजेन , तेक साठी घोगल क झाड ला लाल कपडो बांधकन नवस बोलत होता . 

* जूना जानता लोगना सांगस क वोन बेरा मन्नाथबाबा तिरकोनी आकार म च होता . आब वोनऽ तिरकोनी मूरती ला नाक , डोरा , मुंडो असा आंग फुट रह्यास . मन्नाथबाबा की महिमा अगाध स . 

* भगवान सिरी राम , सीता माय आन् लक्षुमन बनवास क बेरा नासिक परिन मोझरी की दास टेकडी ला आयाता . वासिन मन्नाथगड ला आया आन् कयी दिन यहान रह्या . बाद मऽ यासिन रामटेक गया , असी मान्यता स . मन्नाथगड क खलतऽ आब बी सीता नहानी स . येनऽ कुंड ला फाडी कन् बांधेतो . वका चिराना आब बी दिसस . भगवान राम , सीता माय आन् लक्षुमन जी का पवितर पाय मन्नाथगड ला लाग्यास . भगवान सिरी रामजी न यहान च भगवान भोलेनाथ की स्थापना करकन् पूंजा करीस , असी मान्यता स .

* देऊर क आवार म आब बी येक घोगल को झाड स . मन्नाथगड क पायथा जवर क गाव को नाव बी घोगरा स . पह्यले यहान घोगली का खूब झाडना होता , तेकन येनऽ गाव को नाव घोगरा पडेस , असी मान्यता स . 

* आपलऽ देस म गुप्त राज ( इ.स. ३२० - ५५० ) पासिन देऊरना बांधन की सुरवात भयी . 

* देवगिरी क यादव राज म इ.स. १२५९ पासिन इ.स. १२७४ पावतर हेमाद्री उर्फ हेमाडपंत येनऽ राज को पंतप्रधान होतो . यादव राजा महादेव राव ( इ.स. १२६१ - इ.स. १२७० ) आन् राजा रामदेव राव ( इ.स. १२७१ - १३११ ) इन क कारभार क बेरा हेमाडपंत न भगवान भोलेनाथ का , चंडिका माय का खूब देऊरना बांध्या . वून क पह्यले बी इ.स. ११०० - १२५० काल म असाच देऊर बन्या . पर येनऽ देऊरना म नक्सीकाम की कारागीरी जास्त रवत होती . यादव राज क काल म ( इ.स. १२५० - १३५० ) नकसीकाम थोडो कम भयो पर देऊरना की संख्या खूब बाहाडी . आन मराठा राज क काल म इ.स. १८०० पावतर या परंपरा रही . 

* हेमाडपंथी मंदिर की वास्तुकला मालवा क भूमीज देऊर कला ( राजा भोज - समरांगण सूत्रधार ) आन् नागर ( इंडो आर्यन ) देऊर कला मिन निबजी . हेमाडपंथी मंदिर की आपली येक खासियत स . येनऽ वास्तुकला म कारो पास्यान / खरफ बापरस . फाडी क जोड साठी / दरजा भरन साठी चुनो , गारो , मसालो यको बापर नी होत . यी बांधकाम कोड्डो रव्हस . बांधकाम क अनुसार चवकोनी , तिरकोनी , लंबा , आखुड असा दगडना घडावस . दगडना क पकड साठी दगड म च खोबन , खाच , खुटी बनावस . देऊर का खंबा येक च दगुड म घडावस . खंबा चवकोनी , साहाकोनी , आठकोनी रव्हस . मंझार क पट्टी म मूरतीना , बेल , पत्ता , भूमिती की आकरुतीना रव्हस . छत म कोनटा परिन दगडी पाटीना रचस आन् मंझार म कमल क फुल नी त् झुंबर की डिझाईन वालो दगड मांडस . हेमाडपंथी मंदिर म प्रवेशमंडप , सभामंडप , अंतराल आन गाभारो असी रचना रव्हस . दरुजा पर गनेसपट्टी , तोरन रव्हस . अंतराल जवर नंदी की मूरती रव्हस . 

बाहिरीन जोतापासिन च कनी की डिझाईन बनस ज्या सीधी आमलक पावतर जास . सिखर की नानी नानी आकरुतीना बी बुड पासिन च जास .  आमलक क वरतऽ करस ( कळस ) रव्हस . 

२. देऊर की रचना : * मन्नाथेस्वर देऊर की सभामंडप ( २५ फिट आन् १६ खंबा ) , अंतराल ( ८ फिट ) आन तीन फुट खलतऽ १० x १० फुट को गाभारो , असी रचना स . मन्नाथेस्वर देऊर सूर्व्यामुखी स . 

* गाभारा म सयोनिज सिवलिंग स . वेदी ( पीठ ) को आकार गोल रव्हस पर यहान क वेदी को आकार चवकोनी स . वेदी को मुंडो उत्तर दिस्या म स . सिवलिंग की पूंजा दकसिन दिस्या म बसकन , महादेव मुखी रह्यकन कऱ्या पायजे , असी मान्यता स . 

* देऊर क दिवाल ला बाहिरीन जोतापासिन तिरकोनी बांधकाम करकन् सहारो देयेस . देऊर को सिखर ,  कोनी कव्हस क बनेच नी त् कोनी कव्हस काल क मार कन् पडझड भयीस . आब गाभारो आन अंतराल को सिमिट चुना को सिखर बनायेस . 

३. पूंजा किरतन आन् उत्सव : * राष्ट्रसंत तुकडोजी महाराज को कार्यक्रम मन्नाथगड प भयेतो . वून को नानोसो देऊर बी यहान स . आब बी तुकडोजी महाराज क याद म यहान कार्यक्रम आन् महापरसाद होस . 

* पह्यले यहान पकडगिरी महाराज रवत होता .वून क बाद रामदास महाराज मन्नाथेस्वर क सेवा म होता . रामदास महाराज नानपन पासिन बुलढाणा किथिन यहान आयाता . वून न रिसिदरा म ११ बरस तप करेतो . मन्नाथबाबा को देऊर आन् बाकी येवस्था वून क च हात प भयी . 

* हर सोम्मार ला मन्नाथेस्वर सिव जी की पूंजापाती आन् आरती होस . 

* महासिवरातरी ला मन्नाथगड पर मोठी यातरा भरस . 

* मन्नाथेस्वर मंदिर आन् उत्सव कमिटी क देखरेख म साल भर यहान कार्यक्रम होस . 

# नवस ला पावनी वालऽ मन्नाथेस्वर आन् मन्नाथबाबा की मोठी महिमा स . 

# रामायण काल पासिन को इ पावन , पुरातन तीरथ देस भर म परसिध्द स . 

जय मन्नाथेस्वर सिव भगवान की...

जय मन्नाथबाबा की...

( यासीन भोरगड जवरच स ... भोरगड की खोज आघ आयेनच..)

( सहयोग : मनोज भाऊ गोरे ) 

लेखक : सुरेश महादेवराव देशमुख , नागपूर