भोयर अन् नदी माय - ६ : पूर्ना. bhoyar culture _ भोयर संस्कृति. bhoyari dialect _ भोयरी बोली

भोयर अन् नदी माय - ६ : पूर्णा

Bhoyar culture _ भोयर संस्कृति

Bhoyari dialect _ भोयरी बोली

नर्मदा सरयूश्चैव तथा वेत्रवती नदी

तापी पयोष्णी चंद्रा च विपाशा कर्मनाशिनीम् ।४।

पुष्या पुर्णा तथा दीपा विदीपा सूर्यतेजसा

सहस्त्रवृषदानात्तु यत्फलं लभते ध्रुवम् ।५।

__ महादेव उवाच 

पद्मपुराण खण्ड ६ ( उत्तरखण्ड: ) अध्याय - ०२२

नदी सभ्यता आन् संस्कृति ला जलम देस . माय का सारा गुन नदी म रव्हस . तेकन नदी ला माय च कोस , वोकी पूंजा करस . भोयर संस्कृति बी नदी माय क सहारा कनच पयदा भयी , बाहाडी ! भोयरी संस्कृति मऽ पुर्ना माय ला खास मान स . 

* पूर्ना नदी का पयोष्णी , पयसानी , संपूर्णा , अन्नपूर्णा , चंद्रकला यी नावना स .

* मध्यप्रदेस क बयतूल जिला म भैंसदेही जवर कासी तलाव मिन पूर्ना माय को उद्गम भयो . 

१. इतिहास आन् मान्यता : * ' पूर्णा दर्शन ' म पूर्ना माय की जलम कथा सांगीस . पूर्ना माय क उगम जवर महकावती ( महिष्मति ) या रघुवंसी राजा गय की राजधानी होती . बाद म महिषासुर नाव पडे . आन् आब भैंसदेही नाव स . गय राजो निसंतान होतो . वून न दुरवास रिसी ला यी दुख सांगे . अठ्ठ्यासी हजार साधुसंत की रोज सेवा करन को उपाव वून न राजा ला सांगे . राजा न उसोच करे . येक दिन साधू लोगना न दूध मांगे . येतरा साधुसंत साठी दूध की येवस्था करनो मुसकिल च काम होतो पर साधुसंत ला नाराज बी नी करता आवत होतो . राजा न देवाधिदेव महादेव की आराधना करी . भोलेनाथ जी न येनऽ धरमसंकट मिन बचावन  साठी चन्द्रकला ला धरतीलोक प ल्यावन को उपाव राजा ला सांगे . चन्द्रकला न तमाम साधुसंत ला तृप्त करे पर बाद मऽ वून न दूध को अपमान करे . दूध पेकन बी वून क मन म चन्द्रकला साठी माय को भाव नी आयो . वून क मन म वासना पनपन ला लागी . चन्द्रकला ला राग आये न वा गायब भयी . चन्द्रकला क गायब भया प राजो चिंता म पडे . वून न करून ( करुण ) स्वर म चन्द्रकला साठी विलाप करे . ममतामयी माय चन्द्रकला को मन पिघले . वा दूधधारा क रूप म जमीन सिन निकरी , तेकन वोला ' पयोष्णी ' इ नाव पड्यो . वोकऽ तप बल कन् साधुसंत दगड बन्या . याच पयोष्णी आघऽ चलकन् पूर्ना क नाव कन् परसिध्द भयी .

* गनेस पुरान लिखनीवाला रिसी मुद्गल को आसरम पूर्ना माय क काठ पर रिनमोचन ला  स . 

* कासी तलाव प पूर्ना माय आन् सिध्देस्वर नाथ महादेव मंदिर स . येनऽ मंदिर क निरमान साठी राजा न वोन बेरा का परसिध्द इंजिनिअर नागर - भोगर ला बलायो . इ दुय भाईना केतरो बी मोठो काम रव्हन देव , येकच रात म पुरा करत होता . आन् वूई नाघोरा कन् काम करत होता . वून ला काम करन क बेरा कोनी न देखे त वूई गोटा बनत होता . नागर - भोगर भाई न काम चालू करे . जेवनबेरा प वून की बहिन सिदोरी लेकन गयी . वा गयी तब काम चालू च होतो . वोनऽ गलती कन् भाईना ला देख लेये . बस्स.... दुय बी भाईना दगड बन्या आन् देऊर को काम अपुरोच रहे , असी मान्यता स .

* सूर्व्यदेव की आन् पुनव क चांद की पह्यली किरन गाभारा ( गर्भगृह ) म पडस .

* नंदी ला जोरकन् हात लगाये त् घंटी सरखी आवाज आवस .

* पुरान कऽ अनुसार सिध्देस्वर नाथ ' उपज्योर्तिलिंग ' स . 

* पूर्ना को मतलब पुरो आन् पयोष्णी को मतलब अमरित स .

* रुखमनी हरन क बाद सिरी किस्न देव आन् रखुमाई पूर्ना काठ क ' रिनमोचन ' तीरथ प गयाता . 

२. तीरथ आन् उत्सव : * भैंसदेही पासिन ५ कि.मी. पर घोघामा गाव जवर कारतिक पुनव पासिन १५ दिन को पूर्ना मेलो भरस . जिन ला पोटुबाटु नी वूई लोग मन्नत मांगस . आन् वून की मन्नत पुरी भयी त् पोरग्यो नी त् पोटी ( जि बी भयी होयेन ) ला लेकन यहान आवस . वोला पारना म धरकन् पूर्ना माय क कोरा म डावस . 

* पूर्ना - सरोसती संगम प वामनी तीरथ स .

* रिनमोचन ( ऋणमोचन ) तीरथ पर पूर्ना माय सूर्व्यामुखऽ बाह्यस . यी तीरथ पुन्यकारक स . यहान पुस मह्यना क इतवार ला घाडोच महत्त्व सऽ . पुस मह्यना क हरेक इतवार ला यहान मेलो रव्हस . पुस मह्यना पासिन रथसपतमी पावतर रोज भंडारो रव्हस . गाडगे महाराज न यहान घाटना बांध्यास . 

* चांगदेव जवर पूर्ना माय सूर्व्य की लेक तापती ला भेटस . यहान योगी गुरू चांगदेव को देऊर स .

# जय पूर्ना माय #

लेखक : सुरेश महादेवराव देशमुख , नागपूर