अजब - गजब , भाग - २ : बोरी गाव

अजब- गजब , भाग - २: बोरी गाव

महाराष्ट्र म वर्धा जिला क कारंजा तहसील म कारंजा - काटोल सडक पर ६ नंबर क हायवे परीन दुय कि. मी. दूर  गाव बोरी स .

बोरी गाव ला दुय - ढाई हजार बरस की मानव सभ्यता की परंपरा स . इ. स. पु. १००० पासून इ. स. पु. ७००/८०० बरस म यहान लोहयुग ( बृहदाश्म युग ) का अवसेस इजबड्डी क रूप म स .  पटवारी रिकार्ड म वू रिठो स. पुरान को खोंड्या ( खोंडे ) पटवारी न गाव वाला किथिन वरगनी जमा करकन् उघडऽ  हनुमान साठी पक्को देऊर बनायो. बाह्यरऽ मातामाय स. वोको मुन संसोधन कऱ्यापर अउर येक अचंबो आघऽ आयो. इजबड्डी को मु जब मोजमाप कर रह्यो थो , तब बड्डी पर पक्की इटना को सातरोच मला दिसे. वहान खंदकन मोठऽ  आकार की इट साठी मुनऽ जब प्रयास कऱ्यो तब सह्यगी इट त नै पन् अरधी - पाउन आकार की इट सापडी. वा पतली , चवडी आन् हलकी स.  मनसर क खुदाई म ज्या इटना निकरीस ; बराबर उसीच या इटना स . 

बोरी गाव ला नदी नहाय . नालाना स जी कार नदी ला मिरस . गाव स टेकडा पर . टेकडा क तीन बाजू कारी भरार माती को सिवार ! 

बुजरूक लोगना सांगस क पह्यलऽ घोडाई सिवार पानी म होतो . घोडदेव येक बंधारो होतो , तेकन घोडाई म तलाव बन्योतो . गाव क महादेव मुखऽ स घोडदेव आन् सूर्व्यामुखऽ स आम्बावाली नदी . आम्बावाली नदी बोरी आन् चंदनपाल्डी गाव क सिवार की हद .

१) पह्यली संस्कृती : लोहयुग ( बृहदाश्म युग ) ___ ज्यान दगडना का गोल घेराना दिसन तब समज जावो क इ लोहयुग काल की होयेन. या कुटुंब की दफन की जागा रव्हस . वको आकार ( घेरा को ) १० फुट पासीन ५० फुट पावतर रव्हस ; आन उचाई ३ फुट पासीन ५ फुट पावतर रव्हस. अचरज की गोस्ट स क घेरा को आकार केतरो बी रव्हन देव ... दगडना ४० च रव्हस. पर इजबड्डी को घेरो १००० फुट आन् उचाई ३० फुट स . नाप को परमान १० कोच स . बुड पर मोठाला दगड को घेरो. जसा जसा वरत जायेन उसा उसा घेरा आन् दगड को आकार लहान होत जास. रचना पायरी सरखी. आब पावतर जेता सिलावर्तुल सापड्यास वो म को इजबड्डी इ सबन म मोठो स .  

काल : २५००/ ३००० बरस .

२) दुसरी संस्कृती : थेन - लोहयुग क बाद म या संस्कृती नांदी. माती की भुंजी इटना को बापर येनऽ  संस्कृती की वरख. येनऽ  इट म मंझार की माती आन् बाहिर क आवरन की माती बेगरी बेगरी स. इ इंजिनीअरिंग को खास तंतर इट ला मजबूत आन् हलकी बनावस. 

काल : १५०० / २००० बरस.

३) यान गवरी लोगना की बस्ती होती आन् वुई लोग घोडदेव म गवूर सिरवत होता , असा बुजरूक लोगना सांगस. घोडाई म तलाव बी होतो , असा जानकार सांगस. उनकी येक बरात घोडदेव डोह म सपीस , असी बी कथा स.

काल : ६०० / १००० बरस

महामारी , अकाल , इज पडनो , स्थलांतर , राजकारन असा कारनकन् यी तीन संस्कृती को नास भयो होयेन. म्हरो इ संसोधन अरुणा प्रकाशन , लातुर क " शोध यात्रा " नाव कं संसोधन किताब म २०१३ ला प्रकासित भयेस. 

४) बोरी गाव म भोयरना आया ३०० - २०० बरस क मंझार. यान की मालगुजारी बोरगाव ( कोंढाली क जवर को ) क देसकर बामन ला भेटी . पह्यले वको घर - कोठो बन्ये. मंग बयंगन्या , बारंगा , चोपड्या , कडवा ना आया. घोडाई , कासाडी , बामनीन वालो , आंब्यावालो , खोसो इ भारी जमीन को सिवार.. कारी भरार माती . गाव स मुरुम क टेकडापर.. रेंदा चिक्खल को नाव नही. गाव ला नदी नहाय. नालाना स ; जी कार नदी म जास. गांधी वध क बेरा म मालगुजार बामन गाव मीस्यिन भाग्या. वकी बेगार बी खतम भयी.

आमार कुर का करनुजी देसमुख यहान १०० साल पह्यले येकारजून परीन आया. बोरी का कडवा ना नाता म होता तेकन आया होयेन. मु पाचवी पीढी म को. येकारजून का देसमुखना चिचोली परीन आयास. आमारो वाघोबा भालेवाडी म स.

गाव की लोकसंख्या अंदाजकन् देढ हजार. कुनबी , गवारी , गोंड , सुनार , चंभार , बानी , बाडी , म्हाली , लवार को येक येकच कुर - घर. बाकी तेली आन् नवबौद्ध ( मांग नं महार ) . ८०% भोयरना. म्हरऽ नानपन सारा लोगना ( कोई बी जात का ) भोयरी म च बोलत होता.

पह्यले संतरा , जवारी , उडिद , भुईमुंग खूब पिकत होता. आब रोही डुक्कर क उबद्रा कन् भुईमुंग गायब भयी. कोरसी क बिमारीपासून संतरा खतम होन क रस्ता पर स. जवारी - उडिद त् दवाई साठी बी नही होत. आब सोयाबीन , कापूस , तोर , गहू की फसल होस. दुय चार झना सब्जीभाजी की फसल लेस. पर आब बी पारंपारिक खेतीच होस.पह्यले लोगना क जवर खूब गाय , मयीसना रव्हत होती. आब परमान लयच कमी भयेस. 

सबनच लोगना सिक्या सवऱ्या स. नवकरी , धंदोपानी म बी बोरी गाव का लोगना स.बोरी गाव क महादेव मुख वर्धा जिला को आखरी गाव धर्ती आन् कार नदी दुय कि. मी. स .  सोम्मारं ठानेगाव , इतवार कारंजा आन् मंगरवार काटोल को बजार लोगना करस. पेन क पानी की लाईन घोडदेव आन् कार धरन मिसिन आयीस. ८ वी पावतर स्यारा स . सारा सन - तिवार धुमधाम कन् मनावस . 

पारंपारिक खेती किरसानी , ढोर जनावर की कमी , संतरा बगिच्या को नास क कारन लोगना की आर्थिक परिस्थिती पर खूबच असर पड रह्येस.

लेखक : सुरेश महादेवराव देशमुख , नागपूर