अजब - गजब , भाग - ५ : रामगढ. bhoyari dialect _ भोयरी बोली

अजब - गजब , भाग - ५ : रामगढ

Language of article : bhoyari dialect _ भोयरी बोली

महाराष्ट्र मऽ नागपूर - अमरावती हायवे पर नागपूर जिला म कोंढाली गाव स . कोंढाली - मासोद कामठी सडक पर कोंढाली पासिन ६ कि.मी. दूर जेवनऽ हाथ पर दिसस अजब गजब ' रामगढ '! रामगढ क पेट म स ३००० बरस को इतिहास ! रामगढ क पहाडी ला दुय गढना स . येक ला रामगढ कोस आन् दुसरा ला लकसुमन गढ !

१. पास्यान युग :  पास्यान जुग का लोगना गुफा मऽ बी रव्हत होता . असीच गुफा रामगढ म स . सूर्व्यामुखऽ येन गुफा की लंबाई ५५ फुट आन् चवडाई १३ फुट स . हात वरतऽ करकन् उभो रवता आयेन असी ८ फुट की उचाई स छत की . गुफा क छत को आकार कमान सरखो स . पुरातत्त्व स्यास्तर मऽ येला हत्ती क पाठ को आकार ( गजपृष्ठ आकार ) कोस . येमऽ कुटुम्ब रवन लाईक जागा स . येक घरच समजो . या गुफा आपरंग नही बनीस . वोनऽ जमाना म येला खंदकन् बनायीस . या गुफा आन् गुफा की जागा अजब गजब स . रामगढ क पहाडी पर या गुफा असऽ जागा पर बनायीस क् जवर जात पावतर वा दिसत नही . पहाडी पर अरधऽ डोना सरखी जागा स जी  रस्ता परिन दिसत नही . येन डोना सरखी जागा क येक ठड्डी ला या सूर्व्यामुखऽ गुफा बनायीस . इ वून को बचाव को , उजिड को खास तंतर . गुफा म रवनी वाला ला दूर को सबन दिसस ; पन् वूई लुककन् रव्हस . आन् भेव , खतरो दिख्यापर वूई पटकन् चंदर कोर क आकार वाली पहाडी पर चेंगकन् आन् हमलावर ला घेरकन् दगुडना को जोरदार हमलो कर सकत होता . आन् समजो हारन की नवबत आयी त् वोकऽ बचाव को बी गुफा म जुगाड स . गुफा क अंदर येक मानूस जान जोगती भुयार को चोर रस्तो बी स . येनऽ चोर रस्ता कन् १००/२०० फुट , कोनी ला दिस्याबगर जाता आवत होतो . वू रस्तो पहाडी पर जास , ज्यान खूब मोठमोठा कारा दगना स . वासिन आजूबाजू का कयी भोयर समाज का  गावना  दिसस . 

२ . वाकाटक राज को  जुग :  पास्यान जुग की संस्कृती सप्या बाद यहान २००० बरस पासिन क वाकाटक राज का अवसेस बी सापडस . सातवाहन राज क बाद वाकाटक राज आये . वाकाटक राजो प्रवरसेन ला चार पोटूना होता . तेकन राजा न आपलऽ राज का चार हिस्सा कऱ्या . मोठा की राजधानी पह्यलऽ नगरधन आन् बाद मऽ पवनार होती . आन् बाकी पोटूना की वासिम , छत्तीसगढ आन् सोलापूर जवर होती . येन बेरा रामगड येक मोठो ठिकानो / ठानो होतो .... मोठी बसती होती . या जानकारी पुरातत्व विभाग म सापडस . रामगड पर आबऽ बी लोगना ला सोना चांदी का नाना - मोठा भांडाना सापडस . 

 

३ . रिठी गाव :  या संस्कृति नांदन क बाद म बी रामगड आबाद होतो . पटवारी रिकार्ड म रामगड रिठी गाव स . 

४ . वर्तमान : आबऽ रामगड क गुफा म सिवलिंग आन् गनपति की मूरत स . वरतऽ क टेकडा पर सेंदूर का देवना स . वहान येक केसव नाव को साधू रव्हत होतो .‌ उसा त् केताक साधूना आया आन् जप तप करकन् गया . गुफा क जवर येक भीर बी खांदकन् देखीती पन् वला पानी नही लाग्ये . गुफा की येक विसेसता असी क वोमऽ तुरटी सरखी बास आवस . कारंजा क लटारे महाराज क जमाना पासिन रामगढ म महासिवरातरी ला मोठी यातरा भरस . रामगढ परिन चिखली , मासोद गाव जवरच स . रामगढ क गुफा म सरावन , कारतिक , चईत मह्यना म भजन किरतन करस . आजूबाजू क सिवार वाला खेती को कोनतो बी काम करन क बेरा पह्यले गुफा म पूंजापाती करकन् नारेल फोडस .यहान क लोगना म असी मान्यता सऽ कऽ भाग्यवान मानुस ला रामगढ पर अवस आन् पुनव ला बंडी चालन को न् भदाड बाजन को आवाज आवस . रामगढ आबऽ तिर्थक्षेत्र स . आन् ई. स. २००८ म आमी न यहान ' युवा भोयर पवार मंच ' को कार्यक्रम करेतो .

५ . रामगढ , भोयर आन् मालवांचल : रामगढ क पट्टा म सारा भोयर का च गावना स . नगरधन - पवनार क वाकाटक राजा  ' दुसरो रुद्रसेन ' संगं मालवा क चंदरगुप्त राजा की पोटी प्रभावती को ब्याह भयो . रुद्रसेन खप्या बाद वोको पोरग्यो दिवाकर सेन राजो बने . वू नानो होतो तेकन वोकऽ आजा न ( राजा चंदरगुप्त ) मालवा परिन कयी लोगना ( अधिकारी ) यहान पठायाता . बाद म दिवाकरसेन क नातू न ( नरेंद्र सेन ) मालवा पर बी राज कऱ्यो . भोयर पट्टी आन् मालवा को नातो असो पुरानो स . येन पट्टा क गाव धारपुरे कुटुम्ब  बी जास्त स . धार सिन आया वूई " धारपुरे " . 

सहयोग : १. सुरेश मोतीराम बारंगे ,चिखली [लेख ] 

                 २. हरिराम बारकु जी फरकाडे , उमरी.                    ३. मनोज गोरे , कोंढाली [ फोटो ]

लेखक : सुरेश महादेवराव देशमुख , नागपूर