भोयरी संस्कृति - ७ : नागपंचमी

भोयरी संस्कृति - ७ : नागपंचमी

सरावन मह्यना कऽ चांदनी पंचमी ( शुक्ल पंचमी ) ला ' नागपंचमी ' को तिवार आवस . नाग ला भगवान महादेव कऽ आंग को गह्यनो मानस . वासुकी भगवान महादेव आन् सेसनाग बिस्नुदेव कऽ सेवा मऽ रव्हस . पुरान कऽ अनुसार सूर्व्यदेव कऽ रथ मऽ बारा नाग सऽ , बारा मह्यना का वाहक . राम अवतार मऽ लक्षुमन आन् किस्नऽ अवतार मऽ बलराम कऽ रूप मऽ सेसनाग नऽ अवतार लियो . गनपती कऽ कंबर मऽ लिपट्यो नाग विस्व ( विश्व ) कुंडलिनी आन् वोनऽ नाग को फनो जागरुत कुंडलिनी . पुरी दुनिया सेसनाग कऽ फना पर टिकीस असी मान्यता सऽ . पुरान मऽ नाग ला पाताल लोक को राजो मानस . 

पुरान मऽ नाग का पाच कुर मान्यास : अनंत ( सेसनाग ) , वासुकी , तक्षक , कर्कोटक , पिंगला . कयी पुरान मऽ नव कुर मान्यास : वासुकी , तक्षक , कुलक , कर्कोटक , पद्म , स्यंख , चुड , महापद्म , धनंजय . 

१ . मान्यताये : येनऽ दिन जमुना नदी मऽ किस्नऽ भगवान नऽ कालिया मरदन कऱ्यो आन् वोला वरदान बी देयो कऽ पंचमी ला तोरी पूंजा होयेन . 

समुद्र मंथन मऽ वासुकी नाग ला बापरे . देव - दानव कऽ येनऽ समुद्र मंथन मऽ निकऱ्यो जह्यर भगवान महादेव नऽ पे . पर पेन कऽ बखत जह्यर का ठेंबना सरप कऽ मुंडा मऽ पड्या . तेकन नागदंस पासून बाचन साठी भगत लोगना नऽ नागपंचमी की पूंजा चालू करीस . 

नाग माय लक्षुमी , धन की रखवाली ( रक्षण ) करस . तेकन धन संपत , सुख , उन्नती साठी नागपंचमी की पूंजा करस , येकन धन लक्षुमी को आसिरवाद भेटस . 

२ . नागपंचमी पूंजा :  नागपंचमी कऽ दिन खेत मऽ नागरनो , बखरनो नही करत . भाजीपालो चिरत नही , तावो बापरत नही . 

नागपंचमी ला चवरी जवर आन् दरुजा कऽ दुय बाजू कितऽ तूप कन् नागोबा , बिचू को चितरंग काहाडस. हरद कुकू लगायकन् उनकी पूंजा करस . कढई , लाही - फुटाना को निवद धरस . घर आन् खेत कऽ चारी कोनटा पर लाही - फुटाना को निवद धरस. मध्यप्रदेश म गुजिया ( करंजी ) , पापडी , खिचडा को बी निवद धरस... नागपंचमी ला गुंजी , सवारी , बडा फुलोरो धरस .

पुरानऽ जमाना मऽ पाटी पर नागोबा काहाडकन् आन् कढई , लाही - फुटाना को निवद , बेल - फुल , उदबत्ती लेकन सिकनारा पोटु - पोटीना स्यारा मऽ जात होता . स्यारा कऽ फरा पर गुरजी मोठ्ठो नागोबा काहाडत होता . सबन झन पूंजा पाती करकन् स्येरनी बाटत होता . 

महाराष्ट्र आन् मध्यप्रदेश मऽ नागद्वार की यात्रा को को बी खूब चलन सऽ . 

पह्यले गारोडी लोगना पूंजासाठी जितऽ नाग ला गाव गाव मऽ ल्यावत होता . आबऽ येपर कायदाकन् बंदी सऽ . 

नागपंचमी ला लाही फुटाना संगच सातू को बी मोठो मान सऽ .

३ . भोयरी संस्कृति :  भोयरी संस्कृति नऽ झाड - पेड , जनावर - पाखरू , नदी - पहाड , सूर्व्य - चंदर इन सबन संगऽ आत्मीय सम्बंध जोडन की कोसिस करी . आज क दिन बहुड्डो बोवस.

आपलो देस खेती - किसानी वालो होतो आनऽ सऽ . नाग खेत की रखवाली करस तेकन वोला खेत्रपाल ( क्षेत्रपाल ) कव्हस . फसल को नुकसान करनीवाला जीव जंतू को नास करकन् नाग फसल ला बचावस / बाचाडस .

लेखक : सुरेश महादेवराव देशमुख , नागपूर .

मो . 7066911969