भोयरी संस्कृति - ८ : पोह्यती

भोयरी संस्कृति - ८ : पोह्यती ( राखी )

पोह्यती , पोयती , राखी रक्षाबंधन

सरावन मह्यना कऽ पुनव ला पोह्यती को तिवार आवस . भाई - बहिन कऽ येनऽ तिवार को भोयरी संस्कृति मऽ खास महत्त्व सऽ . भाई - बहिन को नातो जलमकन् भेटस... जिनगानी ला पुरकन् उरस असो साजरो नातो .

१ . मान्यताये : * भविस्य पुरान मऽ असी कथा सऽ : येकडाव देव - दानव की लढाई चालू भयी . देवना को पाड्डो झुकन ला लाग्यो . राजो इंदरदेव भेबार गया . इंदरदेव ' गुरू बृहस्पती ' कऽ जवर गयो . वहान बसी इंदरदेव की लाडी ' इंद्राणी ' सबन बात आयकत होती . वोनऽ येक रेसमी धागो मंतऱ्यो . गुरू नऽ वू भारे ती धागो इंदरदेव कऽ हात ला बांधे . वू दिन होतो सरावन पुनव को . वा लढाई इंदरदेव नऽ जिती . तब पासून सरावन पुनव कऽ दिन राखी बांधन को रिवाज पड्यो .

* महाभारत मऽ भगवान किसनदेव आन् धुरपदा ( द्रौपदी ) की कथा मऽ सिसुपाल संग कऽ लढाई मऽ किसनदेव कऽ उंगल ला घाव भये . ' द्रौपदी नऽ आपलऽ पदर को कपडो फाडकन् उंगल ला बांध्यो . वू दिन बी सरावन पुनव को होतो . 

* वामन अवतार मऽ बी राखी की कथा सऽ . बिस्नूभगवान नऽ बलि राज्या ला हराये . पर राज्या बलि नऽ आपलऽ  भक्ती कऽ तप कन् भगवान पासिन रात - दिन आपलऽ आघऽ रव्हन को बचन लेयो . इतऽ बिस्नूभगवान घर नही आये तऽ लक्षुमी देवी परेस्यान भयी . तब नारदमुनी नऽ जुगत सांगी . लक्षुमी देवी नऽ राज्या बलि ला पोह्यती बांधकन् भाई बनायो , आन् बिस्नूभगवान ला घर लायो . उ दिन बी सरावन पुनव को होतो . 

* गनपती का पोटुना ( सुभ आन् लाभ ) ला येक बहिन पाह्यजे होती . तब गनपती नऽ होम करकन् संतोसी मा को आव्हान कऱ्यो . पोह्यती , सुभ , लाभ आन् संतोसी मा कऽ नाता कऽ याद मऽ बी यी तिवार मनावस . इ विधान भी सरावन पुनव कऽ दिन सकार कऽ बेरा भयो. , तेकन पोह्यती तिवार मनावस .

२. इतिहास को झरोखो :  * सिकंदर कऽ  लाडी नऽ पुरू राज्या ला पोह्यतो बांधकन् भाई बनायो आन् सिकन्दर ला नही मारन को बचन लियो .

* मेवाड की रानी कर्मावती नऽ बहादूरस्या कऽ भेवकन् हुमायून ला राखी पठायी ,  आपलो राज बाचाडन साठी . 

* राजपूत जब लढाई पर निकरता तब उनकी लाडीना उनला कुकू को टिरो लगायकन् हात मऽ रेसम को दोरो बांधत होता . 

३. पोह्यती को अनोखो रूप :  पोह्यती  ला उत्तरांचल मऽ ' श्रावणी ' कोस . महाराष्ट्र मऽ नारियल पुनव , राजस्थान मऽ राखी , कही सावनी तऽ कही सलूनो कोस . उसो येनऽ तिवार को आधिकारिक नाव रक्षाबंधन सऽ . 

राखी कच्चो सूत , रेसम , सोना - चांदी कन् बनावस .

पोह्यती भाई - बहिन कऽ नाता को खास तिवार सऽ . राखी बामन  , गुरू , परिवार की नानी पोटी बी नातलग ला बांधस . 

अमरनाथ की यात्रा आखाडी ला चालू होयकन् पोह्यती ला पूरी होस .

४ . देवराखी :  येनऽ राखी ला राजस्थान मऽ रामराखी कव्हस . लाल सूत पर पिवरऽ रंग वालऽ गुच्छा वाली देवराखी भगवान ला , दरुजा ला , आलमारी ला , मिसीन - गाडी - मोटर ला , घर ला बांधस . पूंजापाठ मऽ हात ला जी दोरो बांधस वोला बी राखी कोस . 

५. पोह्यती ला बहुड्डा की पूंजा करकन् वोला राखी वाह्यस .

लेखक : सुरेश महादेवराव देशमुख , नागपूर

मो. 7066911969