भोयरी संस्कृति- १७, भाग- ४: नरकचतुरदसी

भोयरी संस्कृति - १७ , भाग - ४ : नरक चतुरदसी

ॐ नमो भगवते नन्दपुत्राय

आनन्दवपुषे

गोपीजनवल्लभाय स्वाहा ।।

नरकचतुरदसी क दिन भगवान सिरीकिस्न देव न नरकासुर को वध करे . नरकासुर न मनि परबत पर १६,१०० पोटीना ला बंदी बनायकन् राखेतो . प्राग्जोतिसपूर वोकी राजधानी होती . बंदी पोटीना ला वून क घरवालाय न घर म ले नही , तेकन भगवान न वून सबन सिन ब्याह कऱ्यो आन् समाज म वून की इज्जत राखी . 

दिवारी मऽ अभ्यंग नहान को मोठो महत्त्व सऽ . झुंझुरकाच आंग ला तेल , उटनो लगायकन् आंग धोवस . सूर्व्यदेव निकरन क् पह्यले आंग धोयो त् यमदेव की आपलऽ पर नजर नही पडत , असी मान्यता सऽ . आंग धोया पर आंगधूनी म च , आरती म पाच कनिक का दिवा आन् अकसिद धरकन् माय - भाऊज नही त् बहिन वोवारस . 

गोबर क गोंधन पर तिसरो गोंधन मांडस . आंगना म चऊक पुरस . फटाका फोडस . दिवनाल म खान क तेल कन् दिवा लगावस .

नरक चतुरदसी ला काली चवदस , रूप चवदस , छोटी दिवारी , नरक निवारन चतुरदसी बी कोस . 

लेखक: सुरेश महादेवराव देशमुख , नागपूर