भोयरी संस्कृति - ६ : जिवती

भोयरी संस्कृति - ६

* जिवती *

आखाड कऽ अवस को जिवती तिवार भोयर समाज को खास तिवार सऽ . जिवती कऽ दुसरऽ दिन पासून सरावन मह्यनो लागस . जिवती पासून पोरा पावतर सरावन मह्यनामऽ मासमच्छी नही खात . 

सरावन मह्यनाकऽ पुनव ला सरावन नक्तिर रव्हस तेकन वोनऽ मह्यना ला सरावन कोस .

१. उसो देख्या जाय त् जिवती देवी पोटुबाटूना की राखन / रखवाली ( रक्षण ) करनी वाली माय . वा लक्षुमी को च रूप सऽ . 

कहान कहान सवासिन ला जेवाडन को बी रिवाज सऽ . येनऽ दिन पोटुबाटूना ला वोवारस . पोटुना घर पर नही होयेन त् जेनऽ दिस्याला होयेन वोनऽ दिस्या मऽ अकसिद् फेककन् पूंजा करस .जिवती ला सरावन बाळ की बी याद करस . 

२. चऊर कऽ पीठ को रंग बनायकन् चवरी जवर की दिवाल पर डवरो - डुपन , बखर , तिफन , नागर , खासर , असा खेती कऽ काम कऽ साधन को चितरंग काहाडस . वोकऽ संगच पोटुबाटूना , बयील जोडी , गडी मानुसना को बी चितरंग काहाडस . वोनऽ चितरंग ला चवखुटी रेस काहाडकन् फ्रेम बनावस . हरद कुकू , अकसिद , पिवरऽ धागा कन् उनकी पूंजा करस . 

३ . आपलो देस कास्तकारी जीवन को . येनऽ तिवार मऽ वोकी झलक दिसस . पोटूबाटूना संगच खेतीकाम का अवजार ( साधन ) गडी मानुसना , बयीलजोडी पर बी भोयर समाज पोटुबाटू सरखोच माया करस . जिवती माय ला कोस कऽ म्हरऽ पोटुबाटूना संगच इनको बी ध्यान राखो . ..... किरपा करो . 

४ . जिवती कऽ दिन बाढी / खाती उंबरा पर खिरो ठोकस . असुभ गोस्टऽ ना उंबरा कऽ अंदर नही आया पायजेन तेकऽ साठी यी सुभसकुन . सुनार जिल्याटिन कऽ कागज की जिवती बाटस आन् येक दरुजा कऽ गनेसपट्टीपर लगावस . सुनार की जिवती दरुजा पर , चवरी पर , पेटी पर , संदूक पर बी लगावस . यी आबादानी को सुभसकुन / प्रतिक सऽ . बाढी - सुनार ला घर की लक्षुमी गहू , जवारी , चऊर , दार असो सिधो ( वाढनी )  देस . 

५ . आपलऽ पोटुबाटू की जीवन जोत खूब साल पावतर चांगली रह्या पायजे , खेती - कास्तकारी चांगली रह्या पायजे / चली पायजे येको आसिरवाद जिवती माय येनऽ दिन देस .

( स्रोत : पार्वतीबाई महादेवराव देशमुख ) 

लेखक : सुरेश महादेवराव देशमुख , नागपूर

7066911969