आवर्त ( मराठी कविता ). Marathi language _ मराठी भाषा

आवर्त

Marathi language _ मराठी भाषा

झळाळते मृगजळ

झाकोळते भोळे डोळे

चित्त पंकमय तळे

कसा यशस्वी मी पार्थ ?

गुंफून हावरा कोळी

काळे पातकाचे जाळे

आत स्वतः तळमळे

कसा सफळ मी सार्थ ?

नात्या - नात्यांमध्ये जाळ

सत्य - असत्य हे खुळे

रक्त एकच साकळे

कसा मनी धारातीर्थ ?

अपुरे हे गंगाजळ

अधांतरी दीप जळे

चहुबाजू ढग काळे

कसा पावन मी तीर्थ ?

झाले स्वप्नांचे आभाळ

छळे सौदामिनी जाळे

मार्ग दिशांना ना कळे

कसा भेदू मी आवर्त ?

रचना : सुरेश महादेवराव देशमुख , नागपूर