नाही का सांधून पाहू ( कविता ). Marathi language _ मराठी भाषा

नाही का सांधून पाहू

Marathi language _ मराठी भाषा

किती धावशील वेड्या

पायी पडतील बेड्या

गाव आपुलाच गड्या

नाही का थांबून पाहू ।१।

उष्ण श्वासाचे उसासे

ठाक कोरडी फुफ्फुसे

मति ग्रहणाचे फासे

नाही का लांबून पाहू ।२।

इच्छा उन्मत्त वारु

लोभ देखणा हा चारु

भाव भावना बाजारु

नाही का डांबून पाहू ।३।

रणी अविरत तांडे

भ्रम विलासाचे मांडे

महाप्रसादाचे भांडे

नाही का रांधून पाहू ।४।

ऋतू बंद वाडे नीच

सूर्य चंद्राला संकोच

घर चंद्रमौळी उगीच

नाही का बांधून पाहू ।५।

एक दुसऱ्याशी वाकडे

धर्म पंथाचे तुकडे

गेले विश्वासाला तडे

नाही का सांधून पाहू ।६।

रचना : इंजि . सुरेश महादेवराव देशमुख , नागपूर