अजब गजब - ५९ : शकुंतला बारंगे
Bhoyar culture _ भोयर संस्कृति
Bhoyari dialect _ भोयरी बोली
लहरों से डर कर नौका कभी पार नहीं होती
कोशिश करने वालों की कभी हार नहीं होती ।
_ हरिवंशराय बच्चन
वरतऽ क कविता की लाईन संग जिंदगानी चल्या रह्या लोगना समाज साठी प्रेरना स . वून म की च येक स , शकुंतला बारंगे !
मुक्काम राहाटी , पो . काजरी , तह्यसिल कारंजा , जि. वर्धा येनऽ खेडा म भाऊरावजी लहानुजी बारंगे अन् सौ . अन्नपूर्ना भाऊरावजी बारंगे की दुसरी पोटी जलमी वा शकुंतला ! तारीख १६ डिसेंबर , १९६७ ला शकुंतला को जलम भये . गरीब कुटुम्ब म खुसी आयी , पर या खुसी येकच बरस रह्यी . दुसरऽ साल शकुंतला अपंग भयी . पोलियो सरखऽ बिमारी कन् वका दुय बी हात बेकाम भया . चेहरो बी हेकोडो भयो . शकुंतला जसी जसी मोठी होन ला लागी , उसी वोला बोलन ला बी तकलिफ होन ला लागी . वोला आज बी बराबर बोलता नी आवत . कुटुम्ब पर मुसीबत को पहाड पड्यो .
येनऽ कुटुम्ब की पह्यली पोटी चंदरकला हातपाय कन् चांगली होती , सिरफ शकुंतला च अपंग भयीती . कुटुम्ब म अनखिन तीन भाई अन् येक बहिन को जलम भयो . घर की पयसा अदला की हालत तोरा मासा , वोमऽ बहाडे कुटुम्ब ... येनऽ हालत म शकुंतला को इलाज कसो अन् काय कन् करेन ? कुटुम्ब न आपरो भाग समजे . १५ बरस की होत पावतर शकुंतला को रोज को काम आन् देखभाल माय न करी . सिकस्यन पानी को सवाल च नी होतो . कुटुम्ब अन् माय या च शकुंतला की दुनिया होती . पर बाद म चमत्कार भयो . शकुंतला ला समज आवन ला लागी . दुय हात बेकाम , लुला होता त शकुंतला हात का काम पाय कन् करन ला लागी . सबन ला खूब खुसी भयी . जेवनो , न्हावनो , कपडा धोनो , येनीफनी करनो , दात घासनो , कपडा पेहेरनो , बटन टाकनो , भाजी करनो , सडो सारवन करनो , सयपाक करनो , भांडाना धोनो असा काम शकुंतला पाय कन् करन ला सिखी . लोगना इ चमत्कार देखन ला आवन लाग्या . घर म हासीखुसी को वातावरन भयो .
शकुंतला की काम करन की जिद देख कन् शकुंतला का दाआजी भाऊरावजी न करजो लेय कन् घर म च वला किरानो दुकान डाय कन् देये , कुटुम्ब का बाकी लोगना होता च सहारा साठी ! पाय कन् दोरो गुंड कन् पुडा बांधनो , किराना सामान देनो असा काम वा करन ला लागी . अनपढ शकुंतला अनुभव कन् हिसोब बी बराबर करन ला लागी . गिराइक सामान लेकन शकुंतला ला आसिरवाद देता . आब शकुंतला की हिम्मत बाहाडी . गाव क कई पोटीना संग वकी दोस्ती भयी .
शकुंतला की असी च येक सोबतीन होती , आशा परतेकी . आशा ला वरोरा क आनंदवन की जानकारी होती . वहान अंधरा , अपंग भाई - बहिनना ला सिकवस या बी जानकारी आशा ला होती . आशा न बारंगे कुटुम्ब सिन बात करी अन् शकुंतला ला लेय कन् आनंदवन ला आई . आब आनंदवन म येकली पोटी कसी रह्येन , इ मोठो सवाल होतो . मातर शकुंतला न आनंदवन म रवन की जिद पकडी . वून न अपंग लोगना क वरकस्याप साठी फारम भऱ्ये अन् तारीख १ जुलाई २००१ ला शकुंतला ला हस्तकला विभाग म याडमिसन भेटी .
होस्टल म वकी कारजी कोन लेयेन , रोज क काम म वोला कोन मदद करेन ? इ सवाल त होता च ! पर शकुंतला तमाम काम पाय कन् करस अन् वकी हिम्मत तगडी स , इ देख कन् अधिकस्यक सदासिव ताजने अन् आनंदवन म्यानेजमेंट न हिम्मत बांधी ! आनंदवन को तत्त्व स , ' टाकाऊ पासिन टिकाऊ '! येकऽ अनुसार शकुंतला ला हस्तकला को गुरजी रमेश अम्रु जी न सिखाये . स्यून्य मिन दुनिया बनावन को काम सुरू भये . दोरा ( धागा ) कन् गीरीटींग कारड ( भेट कार्ड ) बनावन म शकुंतला हुस्यार भयी .
शकुंतला क टेरनिंग क बखत सदासिव ताजने जी न शकुंतला ला बाप सरखो संभाले . आघऽ वकी बाबासाहेब आमटे अन् माई संगऽ भेट भयी . डॉ विकास आमटे जी की बी शकुंतला संग भेटभलाई भयी . शकुंतला क टेरनिंग , खानपेन , रवन म कोनती बी कसरि नी रह्या पाह्यजेन , असो वून न सांगे .
असऽ परकार कन् शकुंतला पाय कन् सुई म दोरो डाय कन् कारड पर डिझाईन काहाडकन् , रंगी बेरंगी दोरा बापर कन् , गनपती , फिफोली असा कयी गीरटींग बनावन ला लागी अन् वको नाव होन ला लागे .
आनंदवन म आवनी वालाना म आपलऽ कलागुन कन् शकुंतला परसिध्द भयी . वोला समकस्य काम करता देख कन् लोगना को हिरदो भर कन् आवत होतो . शकुंतला को चेहरो नानऽ पोटुवानी हासरो स . बिक्या गीरटींग कारड का वा बराबर हिसोब धरस .
येक डाव शकुंतला संग येक घाडी च खराब दूरघटना भयी !..... गीरटींग कारड बनावन क बेरा वोक पाय म सुई खुपसी . इलाज कर कन् देख्या पर सुई पाय मिन निकरी च नी . आठ मह्यना वा सुई शकुंतला क पाय म रह्यी , मातर वोकऽ चेहरा पर दुख दरद को नाव नी होतो . शकुंतला न सारो दुख दरद भगवान महादेव सरखो गरा म ( मन म ) च धरे ... वोला चेहरा प आवन नी देये . वा दवाखाना म जान ला राजी नी होती . या गोस्ट होत होत डॉ विकास आमटे जी ला समजी . वून ला धक्को च लागे . वून न ततकाल गाडी कर कन् शकुंतला ला सेवाग्राम क दवाखाना म पठाई . वहान आपरेसन कर कन् वोनऽ सुई ला काढी .
शकुंतला ला आब आनंदवन म २० बरस भयास . वा जरी राह्यटी गाव की स पर आबऽ वको घर आनंदवन च बनेस . २०१४ म शकुंतला की मह्यना काठऽ कमाई होती १५००/ रुप्या ! आपलऽ कमाई कन् शकुंतला कुटुम्ब ला मदद कर कन् घर सहारो बनीस .
शकुंतला क गीरटींग कारड की मोठी डिमांड रवस . वा कपडा प पाय कन् च पेंटिंग बी करस .
इ.स. २०१४ म लेखक डॉ . गोविंद कासट जी न ' श्रध्येय बाबा आमटे यांच्या आनंदवनातील एक संघर्षमय जीवन शकुंतला बारंगे ' येन नाव कन् मराठी म २५ पान को नानोसोऊ पुस्तक लिख्येस .
सुदा हातपाय रव कन् बी आमी नसीब ला दोस देऊस . पर अनपढ , दुय हात लुला अन् बोलना म तकलिफ रह्य कन् बी शकुंतला न जीवन जगनो सिख्यो ! आपलऽ पाय प उभो रव कन् दिखाडे . अन् खुद डटी रही च पर घर को बी आधार बनीस .
शकुंतला की हिम्मत , मुंडा प हासू , मन म बिसवास अन् पाय की कला ला नमन करुस ...
लेखक : इंजि . सुरेश महादेवराव देशमुख , नागपूर
बहन शकुंतला के जज्बे को नमन
ReplyDeleteधन्यवाद जी 🙏
Deleteखूब साजरी प्रेरक जाणकारी।
ReplyDelete