दिशा दाही अंधारल्या ( कविता ). marathi language _ मराठी भाषा

दिशा दाही अंधारल्या

( कविता )

Marathi language _ मराठी भाषा

दिशा दाही अंधारल्या

तोंडा दिसेना तो घास

तळहाताच्या जाळ्यात

धनरेषे गळा फास ।१।

दिशा दाही अंधारल्या

वेगे साकळला त्रास

विण उसवली नाती

धागे बदनाम खास ।२।

दिशा दाही अंधारल्या

कृष्ण विवराचा भास

खेचे तिळ तिळ सारा

 उष्ण जगण्याचा जोश ।३।

दिशा दाही अंधारल्या

एका किरणाची आस

सारा शोषतो काळोख

कुडी बेभानला श्वास ।४।

दिशा दाही अंधारल्या

वांझ स्वप्नी मधुमास

गंधाळली शवयात्रा

घेतो मरूनी सुवास ।५।

दिशा दाही अंधारल्या

सरे जन्माची मिजास

दगदग थंडावली

आता सरणी विलास ।६।

रचना : इंजि . सुरेश महादेवराव देशमुख , नागपूर