राग लोभ

राग - लोभ

ग्यानी लोगना कव्हस क् मानुस क् स्वभाव ला दवाई नहाय. भगवान नं हर मानुस ला बेगरा बेगरा बनायास. रूप , रंग , स्वभाव सबन अलग. जलम भयापर मानुस को जीव येनं दुनिया मं गुतत जास. राग लोभ इ बोलनो सिकन कर पह्यलेच आपन सिकजे. बोलनो , हावभाव कन् आपनला चटकन् राग लोभ समजस.

आबं राग आन् लोभ इ येकच सिक्का की दुय विरुध्द बाजू. लोभ माया कन् आपन येकमेक मं गुत्या रव्हस. .... जगन को बाह्यनो बनस. जास्त मतलब कं लोभ ला हाव कव्हस. येकं उलटो राग सं. आपलो कोनी आयके नही , आपलं मनमुताबिक वागे नही , नुकसान - झगडो करे तं आपनला राग आवस. उसो देख्या जाय त् राग आन् लोभ बिना आकार उकार का सं. जेपर बितस वोकं अनुसार उनको नापजोख ठह्यरस. 

माय बाप कं ममता को लोभ अनमोल. भाई भाई , भाई बहिन , लाडा लाडी क् प्यार को लोभ खट्टो - मिठो.... आबच झगडेन आन् बातच मिरेन बी ! गनगोत , सखी - सोबती कं लोभ को गुताडो जिनगानीभर पुरकन् उरस. पर लोभ जब धन पर जास त् वू हाव म् बदलस.

येक मानुसला देव परसन्न भयो. देव न् वरदान देया क् सूर्व्यनारायन निकरन क् पह्यले तू जेतरी जागा म् जायेन वोतरी तोरी. मंग का देखन को होतो... पठ्ठ्यानं लगायी दौड.... भागत रहे...भागत रहे... रातभर भागत रह्यो..थककन् चूर पन् थांबन को नाव नहाय.. येतरो भागे.. येतरो भागे क् सूर्व्य निकरन क् पह्यलेच धाडकन् जमीन पर पड्यो. वहानच वोको जीव गयो. कहान थांबन को सं , आपली मरयादा - हक केतरो सं ; येला जाननो जरुरी होतो. 

आबं राग को कव्हनो त् अजून भारी सं. राग प्यार - दुलार को बी रव्हस आन् दुस्मनी को बी रव्हस. जेला राग नही आवत होयेन वोला त् देवच समझो ! बिना रागतम को त् मानुसच नहाय. सिस्त , अनुस्यासन साठी बी राग की जरुरत रव्हसच. जब अपमान होयेन , उसुल की यैसी तैसी होयेन , लापरवाही - कामचोरपनो होयेन , गलत काम होयेन वहान त् राग जरुरीच सं. तुमी जिता होयेन त् राग दिसनलाच पाह्यजे. राग लोभ सरन परच सरस. पर कोनीला सरनपर पोहोचन जोगती बी राग घातक सं. मानमरयादा को ख्याल नही राखेन वू राग भी सजालायक सं. 

बिना राग लोभ जीवन चलेच नही. वूइ आपलं दुय खांदापर बसकन् रव्हस. ..... हिरदा आन् डोक्सा कं मझार. 

जेनं राग लोभ ला बस मं करे

वोको जीवन सुधरे.....

           ____ इंजि. सुरेश महादेवराव देशमुख , नागपूर.